Кам тǎван чĕлхене юратмасть-

Вǎл тǎван амǎшне юратмасть.

Кам тǎван амǎшне юратмасть-

Вǎл тǎван халǎхне юратмасть.

Кам тǎван халǎхне юратмасть-

Вǎл тǎван çĕр-шыва юратмасть

Пирĕн тǎван чĕлхе – чǎваш чĕлхи. Эпир мĕн пĕчĕкрен чǎвашла калаçса ÿснĕ.Чǎваш чĕлхи – атте-анне чĕлхи. Тǎван чĕлхе – чи çепĕç те илемлĕ чĕлхе. Мĕн тери илĕртÿллĕн янǎрать вǎл! Пирĕн хамǎр тǎван чĕлхепе яланах мухтанмалла, ǎна упрама тǎрǎшмалла.

Асанкасси пĕтĕмĕшле пĕлÿ паракан вǎтам шкулǎн 10-мӗш класĕнче  вĕренекенсем хушшинче «Пĕлетĕн-и эсĕ тǎван чĕлхене?» вǎйǎ иртрĕ.  «Шевле» тата «Шуçǎм» ушкǎн пĕр-пĕринпе тупǎшрĕç. Темĕн те тумалла пулчĕ вĕсен:  чǎваш чĕлхеçисене те, ваттисен сǎмахĕсене  пĕлмелле, вĕçен кайǎк ячĕсене вырǎсла та куçармалла.  Анчах та вĕренекенсем çухалса каймарĕç, май килнĕ таран хǎйсен пĕлĕвне кǎтартма тǎрǎшрĕç. Ачасемшĕн чи кǎсǎк ĕç вара И.Я.Яковлев ачалǎхне аса илесси пулчĕ. Тĕлĕнмелле: пирĕн  Аслǎ  Вĕрентекенĕмĕр те вĕсем пекех шкула çÿренĕ, вĕсем пекех вылянǎ, кулнǎ.  И.Я.Яковлев пĕчĕклех тǎлǎх ача пулса юлни вĕренекенсене пǎшǎрхантарчĕ. Чǎнах та, Пахомовсен усрав ачи пулса ÿснĕ вǎл, пурнǎç тути-масине аванах ас тивнĕ. Сакǎр çултах лашапа ака-суха тунǎ, çурлапа тырǎ вырнǎ, çǎпата та хуçнǎ. Хресчен ĕçĕ мĕн тери йывǎр пулнине чĕрипе туйса ÿснĕ.

Тупǎшу питĕ хĕрÿ пулчĕ. Никамǎн та хыçала юлас килмерĕ. «Шевле» ушкǎнран кǎшт кǎна ытларах балл пухса «Шуçǎм» ушкǎн çĕнтерчĕ.

Вǎйǎ вĕçĕнче вĕренекенсем тǎван чĕлхепе мǎнаçланма, хǎпартланма, хǎйсем чǎваш пулнипе мухтанма сǎмах пачĕç.