Паян, ака уйǎхӗн 25-мӗшӗнче,
Асанкассинчи пěтěмěшле пěлӳ паракан вăтам шкулта Чăваш чěлхи кунне
уявларěç. Шǎпах çак кун, 174 çул каялла, çут тӗнчене тǎван халǎха
çутлǎх парнеленӗ Аслǎ вӗрентекенӗмӗр Иван Яковлевич Яковлев
çуралнǎ. Халǎха çутта кǎлараканǎн пархатарлǎ ӗçне чǎваш халǎхӗ
яланах сума сǎвать, мӗншӗн тесен унǎн вӗрентӗвӗ
чǎваш çыннине малалла утма анлǎ çул хывма
пулǎшнǎ.
Чăваш чěлхи кунне халалласа, клубра, "Чӑваш
чӗлхи-тӑван чӗлхе" ятпа концерт иртрӗ. Вӗренекенсемпе класс ертӳҫисем
те ҫак уява хастар хутшӑнчӗҫ. Унта вěсем чěлхе халăхăмăрăн хаклăран та
хаклă пуянлăхě, наци пěрлěхěн символě шутланнине палăртрěç. Хамăрăн илемлě те
çепěç чěлхепе сăвăсем вуларěç, юрăсем юрларěç, илемлӗ чӑваш ташшисем ташларӗҫ.
"Солнышко" ача садне ҫӳрекенсем те: Иванова Миланӑпа Федорова Дарина
"Пукане" юрӑпа куракансене савӑнтарчӗҫ.
Çавăн пекех вěренекенсемпе
вěрентекенсем «Пĕтĕм чǎваш диктанчĕ-2022» акцие хутшǎнчěç. Унǎн тĕллевĕ – чǎваш
чĕлхине юратма хавхалантарасси. Пĕтĕм чǎваш диктантне хутшǎнни пĕлӳ шайне тĕрĕслемелли мел
те пулса тǎрать. «Пĕтĕм чǎваш диктанчĕ -2022» акцие 22 вĕренекенпе 3
вӗрентекен хутшǎнма кǎмǎл турĕҫ. Вĕсене пурне те тав сǎмахĕ калатпăр.