Пирĕн тăван чĕлхере мĕн чухлĕ каларăш, сăмах çаврăнăшĕ, вĕрентсе каланă сăмахсем…  Ахальтен мар Аслă Вĕрентекенĕмĕр И.Я. Яковлев Чăваш çĕр- шывне «çĕр пин юрă, çĕр пин тĕрĕ, çĕр пин сăмах çĕр-шывĕ» тенĕ.

Мĕн пĕчĕкрен эпир кĕске, сăвă евĕрлĕ сăмах майлашăвĕсем илтетпĕр.Шкула килсен, вулав урокĕсенче ачасем ваттисен сăмахĕсем çинчен ытларах пĕлме пуçлаççĕ.

Асанкасси вăтам шкулĕнче 3-мĕш класра вĕренекенсем «И. Я. Яковлев калавĕсенчи ваттисен сăмахĕсем» проект ĕçĕпе çулталăк пуçланнăранпах ĕçлерĕç.

2023 çул – Вĕрентекенсен çулталăкĕ, унсăрăн пуçне пирĕн вĕрентекенĕмĕр И.Я.Яковлев 175 çул тултарать. Ҫавăнпа та эпир суйласа илнĕ тема паянхи кун актуаллă.

Чи малтан ачасемпе Иван Яковлевич çырнă «Ача-пăча калавĕсем» кĕнекене вуласа тухрăмăр.  Унтан ыйтусене тĕрĕс ăнлантарас тесе тĕрлĕ тĕслĕхсемпе çирĕплетме тăрăшрăмăр. Хамăр ĕçре 17 ваттисен сăмахĕ пуçтартăмăр. Вĕсене ушкăнсене уйăрса тухрăмăр: «ĕç», «ĕçченлĕх», «чăнлăх-ултав», «туслăх», «хыткукарлăх», «мухтанчăклăх» … Иван Яковлевич ытларах ĕçпе çыхăннă ваттисен сăмахĕсем усă курать. Ахальтен мар чăваш халăхне «ĕçчен халăх» теççĕ тĕпчевçĕсем.

И.Я. Яковлев произведенийĕсен чĕлхи сăнарлă та витĕмлĕ, хăйне евĕрлĕ. Чăннипех те Яковлев - чĕлхе ăсти, ăна ку енĕпе çитекен сахал. Ваттисен сăмахĕсене тĕпчесе пĕлни ачасемшĕн питĕ усăллă пулчĕ. «Яковлев калавĕсем- ăса вĕрентекен хайлавсем», - пĕтĕмлетрĕç виççĕмĕшсем юлашкинчен.